Երևանում, Հայաստանի մարզերում և Արցախում հուլիսի 22-29-ն անցկացվող «Մեկ ազգ, մեկ մշակույթ» 4-րդ մշակութային փառատոնի «Կատարողական արվեստի օրեր» միջոցառումների շարքն անցնում է մերթ սփյուռքից ժամանած մասնակիցների` փառատոնի վերաբերյալ գոհունակության արտահայտություններով, մերթ էլ դրա կազմակերպչական մակարդակի վերաբերյալ դժգոհություններով:

Երբ արվեստագետը դադարում է ռիսկի դիմել, դադարում է արվեստագետ լինելուց, իսկ արվեստը դադարում է արվեստ լինելուց, երբ խառնվում է քաղաքականությանը:

Այս կարծիքին են «Սիվիլիթաս» հիմնադրամի և «Քաունթերփարթ ինթերնեշնլի» կազմակերպած «Մշակույթի քաղաքականությունը» միջոցառման ժամանակ կանադահայ հանրահայտ ռեժիսոր, հայկական ցեղասպանությունը ներկայացնող ամենահայտնի ֆիլմերից մեկի` «Արարատի» ռեժիսոր Ատոմ Էգոյանը և նրա կինը`ճանաչված դերասանուհի Արսինե Խանջյանը:

Հայաստանի պետական ֆիլհարմոնիկ նվագախմբի ղեկավարությունը երկար տարիներ պայքարելուց հետո կապահովվի նոր, գերմանական արտադրության Steinway ռոյալով, որը հնարավորություն կտա սեպտեմբերի 19-ից սկսած արտասահմանյան ճանաչված ռոյալ նվագողներին համերգներ տալ Հայաստանում:

Ռոյալն արժե 62 մլն դրամ (170.000 դոլար), որը հատկացվել է ՀՀ մշակույթի նախարարության կողմից:

Ազգությամբ թուրք ռեժիսոր Ռեհա Էրդեմն իր «Կոսմոս» (Թուրքիա-Բուլղարիա) ֆիլմով միջազգային խաղարկային ֆիլմերի մրցույթում գլխավոր մրցանակ է ստացել Երևանում անցկացվող «Ոսկե ծիրան» միջազգային կինոփառատոնի ժամանակ, որի փակումը տեղի է ունեցել անցած կիրակի` Երևանում:

Շուրջ 500 հայտ էր ներկայացվել 2004 թ. ի վեր անցկացվող միջազգային 7-րդ փառատոնին մասնակցելու համար: Հուլիսի 11-18-ն ընթացող միջազգային փառատոնին մասնակցելու համար ընտրվել էր 120 հայտ, ի թիվս որոնց` 45 մրցութային ֆիլմեր, որոնք մրցում էին այս տարի երեք մրցույթներում, իսկ դրանք դատում էին միջազգային հինգ ժյուրիներ:

«Ոսկե ծիրան» միջազգային կինոփառատոնի ընթացքում միջազգային խաղարկային ֆիլմերի ժյուրիի 5 անդամներից ազգությամբ թուրք Սեմիհ Կապլանօղլուն համոզմունք է հայտնել, որ արդեն այս տարի հայ-թուրքական սահմանը կբացվի:

Նա նույնիսկ ստույգ օրն է նշել` սեպտեմբերի 19-ը: Այդ օրը նախատեսվում է պատարագ մատուցել Թուրքիայի Վանի նահանգում` լճի Աղթամար կղզու վրա 10-րդ դարում կառուցված հայկական Սուրբ Խաչ եկեղեցում: (Ենթադրվում է, որ Անկարայի իշխանությունները, հնարավոր է, ժամանակավորապես բացեն սահմանը` թույլ տալու Թուրքիա այցելել հայերին, որոնք կցանկանան մասնակցել միջոցառմանը:)

Հինգշաբթի լրագրողների հետ հանդիպման ժամանակ երգահան, երգիչ և ռոք երաժիշտ Վահան Արծրունին ասաց, որ հուլիսի 25-ին կայանալիք իր համերգին պատրաստվում է ներկայանալ Կոմիտասի բանաստեղծությունների հիման վրա գրած երգերով: Երաժիշտը կարծում է, որ Կոմիտասին կարելի է դարձնել հայ ժողովրդի այցեքարտն ամբողջ աշխարհում, սակայն ՀՀ մշակույթի նախարարությունը այդ ուղղությամբ ոչինչ չի անում:

Հայ հուշարձանագետն ահազանգում է, որ Վրաստանում հերթական հայկական եկեղեցին է վրացականացվում: Թբիլիսիի Մուղնու Սբ Գևորգ եկեղեցին, որը նախորդ տարի փլուզվել էր և Վրաստանի իշխանությունների միջոցներով վերականգնվում է, այժմ էլ հռչակվել է վրացական:

«Սա գիտակցված ոչնչացում է և իրականացվում է Վրաց եկեղեցու գլխավորությամբ, իսկ մեր եկեղեցին լուռ է, նրանք ակտիվ են, երբ նոր եկեղեցի է պետք կառուցել»,- «ԱրմենիաՆաուին» ասում է Հայկական ճարտարապետությունն ուսումնասիրող ՀԿ հայաստանյան գրասենյակի պատասխանատու Սամվել Կարապետյանը:

Ծիրանը բարձր գնի պատճառով վայելել բոլորին չի հաջողվում, բայց ֆիլմասեր հասարակությունը դրա տեղը լրացնում է` այցելելով «Ոսկե ծիրան» կինոփառատոն, որը 2004 թ.-ից ամեն տարի անցկացվում է Երևանում:

Արդեն երեք օր է, ինչ Երևանը վերածվել է իսկական կինոքաղաքի: Հայաստանի մայրաքաղաքի կինոթատրոններում և այլ դահլիճներում կիրակի մեկնարկած կինոփառատոնի շրջանակներում կցուցադրվեն 120 միջազգային ու հայկական ֆիլմեր: Միջոցառումը կավարտվի հուլիսի 18-ին:

«Ոսկե ծիրան» միջազգային կինոփառատոնն այսօր հայտարարել է, որ արդեն 7-րդ անգամ Երևանում անցկացվող և այս կիրակի մեկնարկող ամենամյա փառատոնի աջակիցներ են դարձել Հայաստանում Եվրոպական հանձնաժողովի պատվիրակությունը և Բրիտանական խորհուրդը: Նոր աջակիցների շարքում ավելացել են նաև Հայաստանում Բրազիլիայի դեսպանատունը և բրազիլահայ կինոքննադատ, գրող և կինոռեժիսոր Լեոն Կակովը (Շատարևյան), որը 1977-ին հիմնել է Սան Պաուլոյի միջազգային կինոփառատոնը:

Ամեն տարի Միջազգային հրատարակիչների ընկերակցությունը, Միջազգային գրավաճառների ֆեդերացիան (IBF) և Գրադարանների ընկերակցության միջազգային ֆեդերացիան որևէ քաղաք հռչակում են ՅՈՒՆԵՍԿՕ-ի Համաշխարհային գրքի մայրաքաղաք: Այս տարի Համաշխարհային գրքի մայրաքաղաք է հռչակվել Սլովենիայի Լյուբլյանա քաղաքը, մյուս տարի լինելու է Արգենտինայի Բուենոս Այրեսը, իսկ վերջերս հայտարարվել է, որ 2012 թ. այս պատվին կարժանանա Հայաստանի մայրաքաղաք Երևանը: