Նկատի ունենալով հայկական հեռուստալիքների եթերում գերակշիռ մաս կազմող հեռուստասերիալները, ֆիլմերն ու հաղորդումները, որոնցում մեծ թիվ են կազմում գռեհկաբանություններ, սարսափ, ակնհայտ բռնություններ պարունակող տեսարանները, Հեռուստատեսության և ռադիոյի ազգային հանձնաժողովը (ՀՌԱՀ) մշակել է որոշակի չափորոշիչներ, որոնք, ըստ նրա, կկարգավորեն եթերի բովանդակությունը:

Համաձայն չափորոշիչների նախնական տարբերակի` եթերում չպետք է լինեն անչափահասների առողջության, մտավոր և ֆիզիկական զարգացման, դաստիարակության վրա հնարավոր բացասական ազդեցություն ունեցող հեռուստահաղորդումներ (թմրամոլների, հարբեցողների նմանակում, հոգևոր, մշակութային արժեքների, ազգի երախտավորների նսեմացում, ծնողների և դաստիարակների հեղինակազրկում, օրինազանցության, հանցագործ կենսակերպի քարոզ, հանցագործների հերոսացում և ռոմանտիկացում, գռեհկաբանություն, հայհոյախոսություն և այլն): Էրոտիկ բնույթի և սարսափ ֆիլմերը պետք է ցուցադրվեն միայն գիշերային ժամերին:

Այս չափորոշիչների նախագիծը ներառված է «Հեռուստատեսության և ռադիոյի մասին» ՀՀ օրենքի 24-րդ հոդվածում: Օրենքի փոփոխությունները ընդգրկված են ՀՀ Ազգային ժողովի գարնանային նստաշրջանում, որը բացվել է փետրվարի 1-ին: Չափորոշիչների նախագիծը մշակելու համար ՀՌԱՀ-ում ստեղծվել է մտավորականներից, արվեստագետներից, մանկավարժներից, ու հոգեբաններից բաղկացած աշխատանքային խումբ:

Փետրվարի 4-ին ՀՌԱՀ-ի անդամները երևանյան հեռուստաընկերություններին ներկայացրին չափորոշիչների սահմանման նախագիծը: ՀՌԱՀ նախագահ Գրիգոր Ամալյանն ասաց, որ չափորոշիչները սահմանելիս աշխատանքային խմբի անդամները հիմնականում առաջնորդվել են այն սկզբունքով, թե ինչ չէին ցանկանա, որ իրենց երեխաները դիտեն հեռուստատեսությամբ:

«Մեր խնդիրն էր ստանալ չափորոշիչներ, որոնք մեր հանրության պահանջն են»,- ասաց Ամալյանը:

Հայկական մամուլում հեռուստաեթերի վերաբերյալ սուր քննադատություն լսվեց մանկավարժների ու հոգեբանների կողմից այն ժամանակ, երբ անցյալ տարեվերջին Երևանում գրանցվեց 13-ամյա տղայի դաժան սպանության դեպք 16 տարեկան հարևանի կողմից: Շատերը կարծում են, որ դեռահասների շրջանում նկատվող առանձնակի դաժանությունը հանցագործ աշխարհի կյանքը պատկերող հայկական սերիալների անմիջական ազդեցության հետևանք է, որտեղ սպանություններ ու դաժան հաշվեհարդարներ գրեթե ամեն սերիայում են լինում: Բացի այդ, համաձայն «Առավոտ» օրաթերթի, հեռուստաընկերություններին քննադատել է նույնիսկ ՀՀ նախագահ Սերժ Սարգսյանը հեռուստաընկերությունների ղեկավարների հետ իր տարեվերջյան հանդիպման ժամանակ` ասելով, որ վերջիններս ընկել են վարկանիշի հետևից, ինչի պատճառով հեռուստաեթերը ողողվել է ցածրորակ հաղորդումներով, ֆիլմերով ու շոուներով:

Հինգշաբթի հեռուստաընկերությունների ղեկավարները քննարկման ժամանակ հիմնականում առաջարկեցին պարզություն մտցնել չափորոշիչների մեջ, ավելի հստակեցնել դրանք: Ամալյանը խնդրեց նրանց մինչև փետրվարի 8-ը ՀՌԱՀ-ին ներկայացնել իրենց դիտողություններն ու առաջարկները:

ՀՌԱՀ անդամ, ռեժիսոր Ժիրայր Դադասյանն «ԱրմենիաՆաուին» ասաց, որ անկախ չափորոշիչների սահմանումից, հայկական եթերում ոչինչ չի փոխվի այնքան ժամանակ, քանի դեռ այն չի համալրվել իսկապես պրոֆեսիոնալ մասնագետներով:

«Այժմ յուրաքանչյուր ոք, առանց համապատասխան կրթության, կարծում է, որ ինքը կարող է սցենար գրել, հաղորդում պատրաստել»,- մտահոգվում է Դադասյանը:

Դերասան Արթուր Մկրտչյանը, որը երկու սերիալներում հանցագործ աշխարհի ներկայացուցչի դեր է տարել, ասում է, որ իր մարմնավորած կերպարները հանդիպում են հայկական իրականության մեջ: Սակայն նրա կարծիքով` նույն այդ իրականության մեջ դժվար է որոշել, թե ո՞վ է հանցագործ աշխարհի ներկայացուցիչ, ո՞վ` ոչ:

«Էսօր հանցագործները և´ կառավարությունում են, և´ բիզնեսի ոլորտում: Ո՞նց են տարբերակելու` ո՞վ է հանցագործ աշխարհի ներկայացուցիչ, ո՞վ` ոչ»,- ասում է Մկրտչյանը, որն արդեն երրորդ սերիալում օրենքի ներկայացուցչի է մարմնավորում: