Հայաստանի Հանրապետության Ազգային ժողովի նախագահ Հովիկ Աբրահամյանը մարտի17-ին հեռախոսազրույց է ունեցել Եվրախորհրդարանի նախագահ Եժի Բուզեկի հետ` վերջինիս նախաձեռնությամբ:

Այսօր ավարտվում է Համայն Ռուսիո պատրիարք Նորին սրբություն Կիրիլ Առաջինի եռօրյա այցը Հայաստան, որի ընթացքում նա և իր հայ պաշտոնակիցը կարևորեցին երկու ժողովուրդների և եկեղեցիների միջև առկա ամուր կապերը:

Ամենայն Հայոց Գարեգին Բ կաթողիկոսի հրավերով Հայաստան ժամանած Մոսկվայի և Համայն Ռուսիո պատրիարք Նորին սրբություն Կիրիլ Առաջինը մասնակցել է տարբեր միջոցառումերի. Հայաստան իր այցի առաջին օրը` մարտի 16-ին, Կիրիլ պատրիարքն այցելել է Օշական և ծաղկեպսակ դրել 1826-1828 թթ. Ռուս-պարսկական պատերազմում զոհված ռուս զինվորների հուշակոթողին: Հաջորդ օրը Գարեգին Բ Ամենայն Հայոց կաթողիկոսն ու Մոսկվայի և Համայն Ռուսիո պատրիարք Նորին սրբություն Կիրիլ Առաջինն այցելել են Ծիծեռնակաբերդի հուշահամալիր և հարգանքի տուրք մատուցել Հայոց ցեղասպանության զոհերի հիշատակին:

Մարտի 16-ին Ն.Ս.Օ.Տ.Տ. Գարեգին Բ Ծայրագույն Պատրիարք եւ Ամենայն Հայոց Կաթողիկոսին եւ Մոսկվայի եւ Համայն Ռուսիո Պատրիարք Նորին Սրբություն Կիրիլ Առաջինին Մայր Աթոռ Սուրբ Էջմիածնում, Ս. Տրդատի կամարի մոտ, դիմավորեց Մայր Աթոռի միաբաններից, թեմակալ առաջնորդներից, ռուս հոգեւորականներից եւ ճեմարանականներից կազմված խաչվառազարդ թափորը: Խունկի օրհնությունից հետո, Մայր Տաճարի զանգերի ղողանջների ներքո երկու հովվապետերը, օրհնելով խուռներամ ժողովրդին, «Հրաշափառ» շարականի հանդիսավոր երգեցողությամբ առաջնորդվեցին Միածնաէջ Մայր Տաճար:

Թուրքիայի վարչապետ Ռեջեփ Թայիփ Էրդողանը մարտի 16-ին Լոնդոնում BBC հեռուստառադիոկայանին տված հարցազրույցում երկրորդ անգամ հայտարարել է, թե Հայաստանը պետք է ազատվի սփյուռքի «կախվածությունից» և սպառնացել, որ ցանկացած պահի կարող է Թուրքիայից վտարել հայ անօրինական միգրանտներին:

Ազգային անվտանգության խորհրդի քարտուղար, կոալիցիոն անդամ «Օրինաց երկիր» կուսակցության նախագահ Արթուր Բաղդասարյանն անհեթեթություն է համարում տարածված լուրերը, թե իր կուսակցությանը քվոտայով պատկանող նախարարներին փոխել է պարտադրանքով:

Ընդդիմադիր Հայ ազգային կոնգրեսը մարտի 1-ին հայտարարեց գործողությունների ծրագրի մասին, ըստ որի` ընթացիկ տարվա ամռանը Հայաստանում արտահերթ ընտրություններ են անցկացվելու: ՀԱԿ-ին չանդամակցող կուսակցությունների մեծ մասի ներկայացուցիչներն արդեն հայտարարել են, որ արտահերթ ընտրություններ անցկացնելու նախադրյալներ չեն տեսնում, սակայն գրեթե բոլոր կուսակցություններում սկսվել են վերադասավորումներ, ինչպես նաև նախընտրական նախապատրաստություն հիշեցնող գործողություններ:

Հանրային խորհրդի (նախագահի հրամանագրով ստեղծված մարմին, որում ընդգրկված են երկրի առաջատար հասարակական գործիչներ և մտավորականներ) անդամներն ասում են, որ թեև խորհուրդը կարողացել է անդրադառնալ հասարակական առավել մեծ հնչեղություն ստացած խնդիրներին, սակայն եղել են կարևոր խնդիրներ, որ բաց են թողնվել:

«Օրինաց երկիր» կուսակցության` մարտի 13-ին կայացած քաղաքական խորհրդի նիստում քննարկվել է ՕԵԿ քվոտայով նախարարներ Մհեր Շահգելդյանի և Գուրգեն Սարգսյանի` գործադիր իշխանությունում պաշտոնավարման հարցը: ՕԵԿ քաղխորհուրդը որոշում է կայացրել ետ կանչել նշված նախարարներին և հանրապետության նախագահին ներկայացնել Մանուկ Վարդանյանի թեկնածությունը` տրանսպորտի ու կապի նախարարի պաշտոնում և Արմեն Երիցյանի թեկնածությունը` արտակարգ իրավիճակների նախարարի պաշտոնում: Մհեր Շահգելդյանն ու Գուրգեն Սարգսյանը կշարունակեն պաշտոնավարել ՕԵԿ ղեկավար կազմում` ստանձնելով այլ պարտականություններ: Մարտի 16-ին, ժամը 11-ին, ՕԵԿ գրասենյակում կկայանա ՕԵԿ նախագահ Արթուր Բաղդասարյանի մամուլի ասուլիսը այս և ներքաղաքական այլ խնդիրների վերաբերյալ:

Որոշ հայ քաղաքական գործիչներ ԱՄՆ նախագահ Բարաք Օբամայի` Սերժ Սարգսյանին ապրիլի կեսին Վաշինգտոն այցելելու հրավերը համարում են «հերթական ծուղակ» և Օբամայի համար «հերթական պատրվակ» Հայոց ցեղասպանության ապրիլքսանչորսյան ուղերձում խուսափելու «ցեղասպանություն» բառից: (Հրավիրված է նաև Թուրքիայի վարչապետ Ռեջեփ Թայիփ Էրդողանը:)

Մարտի 13-ին Հայաստանի Հանրապետության Նախագահ Սերժ Սարգսյանը հրավիրել է Ազգային անվտանգության խորհրդի նիստ: