Տուրիստական սեզոնի բացմամբ հայ զբոսաշրջիկները Վրաստանի սևծովյան հանգստավայրեր կմեկնեն Երևան-Բաթում գնացքով, որը գործում է արդեն երկրորդ տարին:

«Արմենիա» գնացքը Երևանից կմեկնի ամսվա կենտ օրերին` ժամը 21:00-ին, և Բաթում կժամանի Վրաստանի ժամանակով 16:30-ին (18 ժամ): 12 վագոնից բաղկացած գնացքը, որը կարող է մինչև 350 ուղևոր տեղափոխել, կգործի մինչև սեպտեմբերի կեսը:

Թեև գործում է Երևան-Բաթում օդանավային չվերթը, գնացքով ճանապարհորդությունն ավելի էժան է, չնայած տևում է գրեթե մեկ օր: Ինքնաթիռի տոմսն արժի 71000 դրամ (մոտ 193 դոլար), թռիչքի տևողությունը 40 րոպե է, մինչդեռ գնացքի երկտեղանոց ննջավագոնի տոմսն արժի 20000 դրամ (54 դոլար):

Չորեքշաբթի «Հարավկովկասյան երկաթուղի» ՓԲԸ (որի հավատարմագրային կառավարմանն է հանձնվել «Հայկական երկաթուղին») հասարակայնության հետ կապերի պատասխանատու Վահե Դավթյանը տեղեկացրեց, որ այսօրվա դրությամբ արդեն 120 ուղևոր է գնացքի տոմս գնել:

14 տարի փակ մնալուց հետո երկաթուղին բացվեց անցյալ տարի: Դավթյանն ասում է, որ ընկերության ղեկավարությունը գոհ է անցյալ տարի երկաթուղով ճանապարհորդած ուղևորների թվից, թեև հրաժարվեց ստույգ թիվը հայտնելուց: Նա հավելեց, որ երեկ մեկնած այս տարվա առաջին գնացքը լի էր ուղևորներով:

Կիրակի (հուլիս 12-ին) Երևան-Բաթում չվերթ բացեց նաև «Արմավիա» ավիաընկերությունը, որի թռիչքները կիրականացվեն մինչև տուրիստական սեզոնի ավարտը:

«Արմավիայի» մամուլի քարտուղար Նանա Ավետիսովան «ԱրմենիաՆաուին» ասաց, որ այս երկու ուղերթերը մեծ հաշվով իրար հետ չեն մրցակցի:

«Այն մարդը, որը կարող է իրեն թույլ տալ ինքնաթիռի տոմս գնել, կընտրի մեր չվերթը: Իսկ գնացքի սիրահարները կընտրեն գնացքը»,- ասաց Ավետիսովան: