Հայաստանյան մի շարք ընդդիմադիր կուսակցություններ և հասարակական կազմակերպությունների (ՀԿ) ներկայացուցիչներ հանդես են եկել հայ-թուրքական արձանագրությունների վավերացման դեմ համատեղ հայտարարությամբ` ասելով, որ այդ արձանագրությունները նպաստավոր են Թուրքիայի «նախապայմաններին», որոնք վնասակար են Հայաստանի համար:

«Դրանք (նախապայմանները) են ցեղասպանության հարցը քննարկման առարկա դարձնելը, ինչպես նաև առկա հայ-թուրքական ապօրինի սահմանի օրինականացումը: Բացի այդ, Թուրքիան օրեցօր ավելի մեծ հնարավորություն է ստանում միջամտելու ԼՂՀ հարցի կարգավորմանը և ձգտում է Հայաստանից կորզել Ադրբեջանին ձեռնտու զիջումներ»,- ասվում է համատեղ հայտարարությունում, որով հանդես են եկել 13 կուսակցություն, այդ թվում` «Ժառանգություն», Հայաստանի դեմոկրատական, Սոցիալ-դեմոկրատ հնչակյան, Ռամկավար-ազատական կուսակցությունները:

ՀՅԴ (արձանագրությունների հիմնական ընդդիմադիր կուսակցությունը) ներկայացուցիչ Արմեն Ռուստամյանը հայտարարեց, որ իրենց պայքարը շարունակվելու է ՀՀ սահմանադրական դատարանում, որտեղ այժմ ուսումնասիրվում են արձանագրությունները, այնուհետև, եթե դրանք վավերացվեն Ազգային ժողովի կողմից, ապա իրենք իշխանափոխություն կպահանջեն:

Դիվանագիտական հարաբերություններ հաստատելու և երկկողմ հարաբերությունների զարգացման վերաբերյալ հոկտեմբերին ստորագրված հայ-թուրքական արձանագրություններն այժմ Հայաստանում ուսումնասիրվում են ՀՀ սահմանադրական դատարանի կողմից: ՍԴ-ն 25-օրյա ժամկետում պետք է որոշի գործը քննության ընդունելու հարցը և դատաքննությունը սկսելու օրը: ՍԴ-ն առավելագույնս երեքամսյա ժամկետում պետք է որոշի, թե արդյո՞ք արձանագրություններում առկա՞ են ՀՀ Սահմանադրությանը հակասող դրույթներ, թե՞ ոչ: Եթե ՍԴ-ն որոշի, որ հակասող դրույթներ չկան, ապա կսկսվի ԱԺ-ում արձանագրությունների վավերացման գործընթացը:

Ռուստամյանը կարծում է, որ ՍԴ-ն պետք է նկատի ունենա այն, որ արձանագրությունները հակասում են ՀՀ Սահմանադրությամբ ամրագրված հայոց պետականության հիմնարար սկզբունքներին և համազգային նպատակներին:

«Բացի այդ, խախտվել է ՀՀ Սահմանադրության 83.5 հոդվածը, այսինքն` միջազգային պայմանագրերի մասին ՀՀ օրենքով սահմանված պայմանագրերի կնքման կարգը և պայմանները»,- ասաց Ռուստամյանը` հույս հայտնելով, որ ՍԴ-ը արձանագրություններով ՀՀ կողմից ստանձնվող պարտավորությունները կճանաչի Սահմանադրությանը հակասող:

«Ժառանգություն» խմբակցության պատգամավոր Ստեփան Սաֆարյանն էլ իր ելույթում ասաց, որ արձանագրությունների դեմ պայքարը ընդդիմադիր կուսակցությունները սկսել են առանձին, սակայն հույս հայտնեց, որ նրանց ջանքերը այսուհետ կմեկտեղվեն` խոչընդոտելու վավերացումը: