Readers' comments

Would you like to post a comment ? Be the first to share your thoughts.

Post a comment

Comments are welcomed and encouraged. However, comments not pertaining to the topic or containing slander or offensive language will be deleted. You have to be registered to be able leave your comment. Sign in or Register now for free.

Մեծացնել նկարը

Թորոսյանը կոչ է անում հարգել օրենքները

Մեծացնել նկարը

Արմեն Գևորգյանը

33-ամյա Արմեն Գևորգյանը աշխատակազմի ղեկավար է նշանակվել անցյալ ամսվա վերջին, այն բանից հետո, երբ անակնկալ հրաժարական տվեց Արտաշես Թումանյանը՝ ակտիվ քաղաքականությամբ զբաղվելու անվան տակ: Գևորգյանը եղել է Քոչարյանի օգնականը 1997 թվականից, երբ վերջինս նշանակվել է Հայաստանի վարչապետ:

Հայաստանի զինապարտության մասին օրենքով՝ զինվորական ծառայություն չանցած զինապարտները չեն կարող նշանակվել պետական պաշտոնի: Գևորգյանը չի ծառայել բանակում, հետևաբար նրա նշանակումը ապօրինի է՝ պնդում է «Գերագույն խորհուրդ պատգամավորական ակումբի» (նախկին պատգամավորների հասարակական կազմակերպություն) նախագահ Ռուբեն Թորոսյանը:

Նախագահի մամուլի քարտուղար Վիկտոր Սողոմոնյանի խոսքերով՝ Գևորգյանը զինծառայությունից տարկետում է ստացել իր գիտական թեզն ավարտելու համար (նա մանկավարժական գիտությունների թեկնածու է): Սողոմոնյանը նույնպես չի ծառայել նույն պատճառով: «Ես մեղք չունեմ, որ չեմ ծառայել. սովորել եմ ասպիրանտուրայում և պաշտպանել եմ թեկնածուական թեզս»,- ասում է նա:

Օրենքով ասպիրանտուրայում սովորողները տարկետում են ստանում, իսկ թեզը պաշտպանելու դեպքում ազատվում են զինվորական ծառայությունից: Սողոմոնյանն ընդունում է, որ զինապարտության մասին օրենքը քննարկման կարիք ունի:

Սակայն Գևորգյանը միակ պաշտոնյան չէ, որ չի ծառայել բանակում: Թորոսյանը պարզել է, որ բանակում չեն ծառայել նաև վարչապետ Անդրանիկ Մարգարյանը, գլխավոր դատախազ Աղվան Հովսեփյանը, Երևանի քաղաքապետ Երվանդ Զախարյանը և տասը նախարարներ, ի թիվս որոնց՝ արտգործնախարար Վարդան Օսկանյանը, արդարադատության նախարար Դավիթ Հարությունյանը և գյուղնախարար Դավիթ Լոքյանը:

Թեև այս պաշտոնյաներից ոմանք տարիքի բերումով չէին կարող ծառայած լինել Հայաստանի բանակում, սակայն անկախ Հայաստանի բանակը խորհրդային բանակի իրավահաջորդն է: Խորհրդային բանակի պահեստայիններն ու զինապարտները ինքնաբերաբար դարձել են անկախ Հայաստանի բանակի պահեստայիններ ու զինապարտներ: Ծառայությունը խորհրդային բանակում համարվում է Հայաստանի օրենսդրության պահանջները բավարարող ծառայություն:

Ըստ հաշվարկների՝ պետական պաշտոնյաների մոտ 60 տոկոսը բանակում չի ծառայել: Վկայակոչելով կառավարության պաշտոնական կայքը (www.gov.am)` Թորոսյանը երկու անգամ հայտարարել է, որ պաշտպանության նախարար Սերժ Սարգսյանը նույնպես չի ծառայել բանակում:

1989-1993 թթ. Սերժ Սարգսյանը եղել է Լեռնային Ղարաբաղի Հանրապետության ինքնապաշտպանական ուժերի կոմիտեի ղեկավարը: Սակայն նրա մասնակցությունը պատերազմին ձևականորեն չի համարվում զինվորական ծառայություն, և Սարգսյանն ինքը չի պնդում, որ դա զինվորական ծառայություն է: Վերջերս նրա կենսագրությանն ավելացվել է հետևյալ նախադասությունը. «1972-1974 թթ. ծառայել է ԽՍՀՄ զինված ուժերում»:

Սակայն դա չի համոզել Թորոսյանին. «Ծառայությունն այնպիսի բան չէր, որ կենսագրության մեջ վրիպեր: Երկու տարի առաջ ես հայտարարեցի, որ Սերժ Սարգսյանը չի ծառայել բանակում: Նա ինձ զանգեց ու հրավիրեց զրույցի: Ասաց, թե երեք տարի ծառայել է բանակում (հիմա դարձել է երկու):

Ասաց, որ ես լրիվ ճիշտ եմ, և ինքը նախագահին կասի, որ անհրաժեշտ է օրենքում փոփոխություն մտցնել, սակայն ոչինչ չարվեց: Ես ամեն անգամ Սարգսյանի կենսագրության մեջ հակասություն եմ գտնում, որից հետո այն ուղղում են: Էնքան եմ արել, որ Սարգսյանի կենսագրությունն իդեալական եմ դարձրել»:

Թորոսյանը մի քանի անգամ դիմել է դատարան, որպեսզի ՀՀ նախագահի նշանակումների որոշ հրամանագրեր համարվեն անօրինական: Դատարանները վճիռ են կայացրել, որ ՀՀ նախագահի հրամանագրերի համապատասխանությունը Սահմանադրությանը պարզելը Սահմանադրական դատարանի իրավասությունն է:

«Սակայն տարօրինակն այն է, որ ես նախագահի հրամանագրերի՝ Սահմանադրության համապատասխանությունը չեմ վիճարկում, այլ այն, որ հրամանագրով խախտվել է որոշակի օրենք»,- ասում է Թորոսյանը:

Թորոսյանի նախաձեռնությունը ողջունել է և պնդումներն իր նամակում հիմնավոր է համարել Զինված ուժերի գլխավոր շտաբի պետ Միքայել Հարությունյանը:

Երևանի պոլիտեխնիկ ինստիտուտն ավարտելուց հետո Թորոսյանը երկու տարի ծառայել է խորհրդային բանակում, եղել է անկախ Հայաստանի առաջին Ազգային ժողովի (այն ժամանակ՝ Գերագույն խորհուրդ) պատգամավոր:

Խորհրդային օրենքով մինչև 1982 թվականը մի շարք բուհերում, որոնց մեջ էր նաև պոլիտեխնիկը, ռազմական ամբիոններում ուսանած ուսանողները ստանում էին լեյտենանտի կոչում, և նրանց համար զինծառայություն պարտադիր չէր: Հետևաբար բազմաթիվ պաշտոնյաներ, որոնք ավարտել են այդպիսի բուհեր, չեն ծառայել բանակում, սակայն դարձել են պահեստայիններ:

1982 թվականից հետո զինակոչիկները պարտավոր էին 18 տարեկանը լրանալուց հետո ծառայել բանակում, անկախ այն բանից, թե որտեղ էին սովորում: Ուսումը շարունակում էին երկամյա զինվորական ծառայությունից հետո:

Նախարարների մի մասը՝ արձագանքելով Թորոսյանի հայտարարություններին, որպես բանակում ծառայություն են ներկայացրել ռազմական ամբիոնի դասընթացները: Վարչապետի մամուլի քարտուղարը հայտնել է, որ նա չի անցել նաև այդ դասընթացները: Իսկ Օսկանյանի մամուլի քարտուղարը նախարարի չծառայելը բացատրել է նրանով, որ Օսկանյանը Հայաստանի քաղաքացի է դարձել 1998-ին, երբ արդեն զորակոչային տարիքի չէր:

Զինապարտության մասին օրենքն ընդունվել է 1998 թվականին: Այնտեղ ասվում է, որ պետական պաշտոնյաների ցանկը, որոնց վերաբերում է օրենքը, հաստատում է կառավարությունը, սակայն այդպիսի ցանկ այդպես էլ չի հաստատվել:

Թորոսյանը 2002 թվականին այդ առնչությամբ բացատրություն է ստացել կառավարությունից. «Վերոհիշյալ ցանկը չի հաստատվել ՀՀ կառավարության կողմից օրենքի այդ հոդվածի և մի շարք այլ հոդվածների միջև եղած հակասությունների պատճառով»: