Հայ գյուղացիներն անհանգստանում են, որ առատ ձյունը կամ խիստ սառնամանիքները, որոնք կարող են հաջորդել այս արտասովոր մեղմ ձմռանը, լուրջ հետևանքներ կթողնեն բերքի վրա:

«Հայաստանի ագրարագյուղացիական միություն» ՀԿ նախագահ Հրաչ Բերբերյանն «ԱրմենիաՆաուին» ասաց, որ տաք ձմեռը Արարատյան դաշտավայրի առանց բացառության բոլոր պտղատու ծառերի (կեռասենու, դեղձենու, ծիրանենու և խնձորենու որոշ սորտերի) վաղաժամ վեգետացիայի և բողբոջելու պատճառ է դարձել: Ըստ Բերբերյանի` եթե տաք եղանակները շարունակվեն մինչև ձմռան վերջը, և ընդհանրապես ձյուն չգա, մայիսին կարելի է առատ ծիրանի բերք սպասել, և ոչ մի խնդիր չի առաջանա:

Իսկ եթե մոտ ժամանակներում ձյուն գա, այնուհետև եղանակը, ինչպես կանխատեսվում է, ավելի ցրտի` արձանագրելով 10-12 աստիճան ցուրտ, ապա բերքը կարող է լուրջ վնասներ կրել:

Նման անձյուն, տաք ձմեռ Հայաստանում եղել է 1963, 1966 և 1987 թթ.: Այդ տարիներին հունվարին ցերեկային միջին ջերմաստիճանը հասել է +5... +7 աստիճանի, գիշերը` մոտ 0 աստիճան, երբեմն էլ անձրևել է:

Թեև Հայաստանի տարբեր շրջաններում ձյան տեղումներ են կանխատեսվել, այդուհանդերձ, երկրի գյուղատնտեսական հիմնական շտեմարանում` Արարատյան դաշտավայրում, ձյուն չի եկել: Այսօր`հունվարի 25-ին երեկոյան, մայրաքաղաքում գրանցվել է ամպրոպ` ձյունախառն անձրևի ուղեկցությամբ:

Հայպետհիդրոմետ ծառայության կանխատեսմամբ` Երևանում հունվարի 26-ին, 28-ին և 29-ին կտեղա ձյուն` գիշերային ժամերին -11 աստիճան ցուրտ գրանցելով: Այնուհետև սպասվում է եղանակի տաքացում, և մինչև փետրվարի 3-ը ջերմաստիճանը կբարձրանա` հասնելով + 10 աստիճանի: