Վերջին շաբաթների ընթացքում հայ հասարակության և լրատվամիջոցների ուշադրության կենտրոնում են հայտնվել «իրարից նեղացած» հայտնի «32 ատամ» հումորային ակումբը և տեղական առաջատար հեռուստաընկերություններից մեկը` «Շանթը», որոնք առանձին դատական հայցերով դատի են տվել միմյանց` պնդելով, թե հակառակ կողմը խախտել է պայմանագրային պարտավորությունները:

Ինչպես «ԱրմենիաՆաուին» հայտնեց «32 ատամ» փրոդաքշնի հիմնադիր և պրոդյուսեր Կարեն Բաբաջանյանը, իրենք «Շանթից» հեռացել են 2009 թ.` իրենց հոկտեմբեր և նոյեմբեր ամիսների աշխատավարձը չստանալու պատճառով:

«Մենք դատարան հայց ենք ներկայացրել «Շանթի» դեմ, քանի որ նրանք չեն վճարել մեր արդար քրտինքով վաստակած գումարները»,- ասում է Բաբաջանյանը:

Տարբեր բուհերի Ուրախների և հնարամիտների ակումբի մասնակիցներից (հետխորհրդային երկրների բուհերի հումորային մրցույթ տարբեր թիմերի միջև) կազմված «32 ատամը», որը Հայաստանում ամենահայտնի ու սիրված հումորային-ժամանցային հաղորդումներից է, ստեղծվել է 2006-ին: Հաղորդումն անցյալ տարվա դեկտեմբերից արդեն հեռարձակվում է մեկ այլ` «Արմենիա» հեռուստաընկերությամբ, որի ծրագրերում գերիշխում են ժամանցային-զվարճալի հեռուստահաղորդումները: 2007-ին հաղորդումը հեռարձակվում էր Հանրային հեռուստատեսությամբ (հենց այդ ընթացքում հումորային ակումբն առավել հայտնի դարձավ, երբ ուղիղ եթերում հանդիսատեսներից մեկի և «32 ատամ» ակումբի անդամների միջև ծեծկռտուք սկսվեց, որը, ինչպես հետո և´ հեռուստաընկերությունը, և´ ակումբը հայտնեցին, «բեմականացված» էր), սակայն ղեկավարության հետ ունեցած տարաձայնությունների պատճառով 2008-ի նոյեմբերից տեղափոխվեց «Շանթ», որտեղ ակումբի անդամները «32 ատամ» շոուից բացի ներգրավված էին նաև այլ հեռուստահաղորդումներում, իսկ նրանցից երկուսը նույնիսկ նկարահանվում էին «Շանթի» հեռուստասերիալներից մեկում:

«Շանթ» հեռուստաընկերությունն էլ իր հերթին դատական հայց է ներկայացրել «32 ատամի» դեմ` հեռուստաընկերության հետ կնքված պայմանագիրը ժամանակից շուտ դադարեցնելու համար: Ըստ պայմանագրի` «32-ը» պարտավոր է եղել ամեն շաբաթ մեկ հաղորդում պատրաստել ու տրամադրել «Շանթին» մինչև 2010 թ. հուլիսի 31-ը:

Բաբաջանյանի կարծիքով` պայմանագրի ավելի մեծ խախտում է գումարներ չվճարելը, որին էլ տրամաբանորեն հետևել է իրենց հեռանալը «Շանթից»: Նա կարծում է, որ «Շանթի» ներկայացրած հայցը տրամաբանական չէ, և այս դատերը պարզապես նպաստում են իրենց փիարին:

«Չեմ կարծում, որ իրեն առաջատար համարող հեռուստաընկերության համար ողջունելի է 15 երիտասարդների խանգարել աշխատել ու գործից կտրել»,- ասում է Բաբաջանյանը` ավելացնելով, որ գումարի մի մասը հեռուստաընկերությունն արդեն իրենց վճարել է («32 ատամը» «Շանթից» պահանջում է 15 մլն դրամ` մոտ 40 հազար դոլար, որից 9 մլն դրամը` մոտ 23 հազար դոլարը, արդեն ստացել է):

Դատարանում «Շանթի» շահերը ներկայացնող իրավաբան Արման Կարախանյանը «ԱրմենիաՆաուին» փոխանցեց, որ «Շանթի» ղեկավարությունը բանավոր տեղեկացրել է ակումբին, որ այս պահին ֆինանսական դժվարություններ ունի և գումար լինելուն պես անմիջապես կփոխանցի այն:

«Մեր կարծիքով` պայմանագիրը ժամանակից շուտ դադարեցնելն ավելի մեծ խախտում է»,- ասում է Կարախանյանը: